पुन्हा एकदा उरणकरांचा जीव धोक्यात ; रेल्वे सेवा कोलमडली

 उरण -नेरूळ लोकल सेवा ठप्प, प्रवाशांची प्रचंड गैरसोय. पुन्हा एकदा उरणकरांचा जीव धोक्यात ; 

उरण दि १२(विठ्ठल ममताबादे )

१२ जानेवारी २०२४ रोजी उरण- नेरूळ उरण -बेलापूर रेल्वे साठी पंतप्रधान नरेंद्र मोदीजींनी हिरवा झेंडा दाखवला होता, पंतप्रधानांच्या हस्ते या रेल्वे सेवेचे उद्घाटन करण्यात आले होते .आणि तेव्हापासून उरण- नेरूळ उरण -बेलापूर मार्गे  रेल्वे सेवा रुजू झाली. रोज हजारो प्रवासी नागरिक, विद्यार्थी, नोकरदार ,व्यावसायिक ,ज्येष्ठ नागरिक या सेवेचा लाभ घेत आहेत प्रवाशांची गर्दी तर दिवसेंदिवस वाढतच आहे. पण रेल्वे फेऱ्यांमध्ये काही वाढ होत नाही. अजूनही उरण- सीएसटी उरण -ठाणे या मार्गावर रेल्वे सेवा उपलब्ध नाही. 

       उरणवासियांच्या प्रवासी रेल्वे फेरीमध्ये वाढ होत नाही हि गैरसोय तर आहेच, पण उरण च्या प्रवाशांच्या  माथी नादुरुस्त रेल्वे मिळत आहेत.दिनांक ६ जानेवारी रोजी ३.४५ ला नेरूळ हुन सुटणारी नेरूळ उरण हि लोकल सेवा मध्येच बंद पडली होती. तेव्हा प्रवाशांना  नाहक त्रास सहन करावा लागला होता. जीव मुठीत घेऊन रेल्वे ट्रॅक वरुन प्रवासी चालत होते.तेव्हाही रेल्वे बंद पडली होती आणि महिला विद्यार्थी, जेष्ठ नागरिक यांचे हाल झाले होते.

     "पुन्हा येरे माझ्या मागल्या" दिनांक ११ मार्च रोजी हि याच घटनेची पुनरावृत्ती झाली ५.३५ ला सुटणारी ट्रेन रेतीबंदर येथे सागरी पुलावर बंद पडून प्रवाशांना रेल्वे ट्रॅकवरुन चालावे लागले. त्यानंतर हि रेल्वे सेवा बंद झाल्याने मार्ग एकच असल्याने यापुढील नेरूळ आणि बेलापूर दोन्ही मार्गावरील येणाऱ्या रेल्वे आल्याच नाही.

लहान मुलांना घरी एकटे ठेऊन माता, भगिनी रेल्वे चालु झाली म्हणून मुंबई, ठाणे, वाशी, बेलापूर, पनवेल या ठिकाणी कामाला जातात६:०० वाजता ऑफिस मधून निघणारी कोणाची आई, बहीण, मुलगी ७:२० पर्यंत घरी पोचतात,पण काळ रेल्वे बंद असल्या कारणाने रात्री ९:३०, १०:०० वाजले तरी घरी पोचलेच नाहीत. बेलापूर, नेरुळ वरून खाजगी रिक्षा करून बरेच महिला घर गाठताना दिसत होत्या.  त्यातच बरेच ola, uber उरण ला येणास नकार देत होते. पालकवर्ग पण तरुण मुलगा, मुलगी ७, ८ पर्यंत येणारे मुलं १०, ११ वाजले तरी घरी परातले नाहीत म्हणून काळजी करत होती.रेल्वे प्रशासन आणि उरणच्या पुढारी, प्रतिनिधी वर बरेच प्रवाशी नाराज व्यक्त करताना दिसत होते.

      उरणकरांना बंद पडणाऱ्या एन. एम. एम. टी. या तर पाचवीलाच पुजलेल्या आहेत, आणि आता बंद पडलेल्या ट्रेन पाठवून उरणकरांचे कोणते प्रवासी हित साधायचे आहे? तसेच रेल्वे च्या अशा हलगर्जीपणणामुळे प्रवाशांचे प्राण धोक्यात असल्याने प्रवासी वर्गाकडून संताप व्यक्त होत आहे.